PDA

Просмотр полной версии : НАЬКЪА ТlА



Sapral Mikail
14.06.2017, 16:07
ДАГАДОАГlИЙ ХЬОНА
уйламугlар САПРАЛ МИКАЬИЛ

Хьона кlай зизаш, лургда аз тахан
Цlена халарахь, хьа дог.
Гуйрена сагото кхийстайер селхан
Вайца лувжаш майра ког.

Цхьана юртахочу пандар локхаш,
Гlайгlане илли оалаш дар.
Амма вай гаьннара хьаьший санна,
Седкъашта чуlийна бlарахьежаш дар.

Дади а вар, ший фаьлгаш дувцаш,
Бераш а гунахь ма кхесташ бар.
lалам а латтар, хаоттам хувцаш,
Нани а къайла данне бат лечкъаш яр.

Дагадоагlий хьона вай хоза ханаш
Малха санна лепаш, йар - Совди мо.
Дицалургдац вайна а вай гlанаш,
Хьа берален баьри вар со.

Гlатта дlайодаш, латта вай гуйре,
Вай дlайха денош човхадеш.
Сома йаргйа сатессале lуйре,
Тешаме бlаргашца латтаргйa беш.

Гlермане, 01. Лайчил 2010

Sapral Mikail
14.06.2017, 16:09
ВАЙ БЕЗАМА ЗЕ
уйламугlар САПРАЛ МИКАЬИЛ

Са уйлаяздар, баьддерзаш латта,
Дохк доалла денош хьаэттад.
Ун-оалхазараш баьдеча санна,
Шoай ткъамашца малх а, дlакъайлаб.

Са велакъажар, са бlубеннар,
Хувцаденнад са беркате цlа.
lаьржа морхаш, са сигале къайла,
Вода со тешаме зама йита.

Зе долаш хилар, да тамашийна,
Сона могац майрра lолувза ког.
Вай безама догамаш тlа шод баь
Oакъинга тарра духадира lа са дог.

Кlурахь хьалбизза, латта са дуне,
Иза дара хьона, хьа безамa зе.
Амма шек йоацаш, йодаш я хьо
Сайга хетт аз, безам хиннабий-те.

Дукха везара, сий деш ма хулар,
Хьа бlаргашка со моастагla вар.
Хувцаденнад селханара къагар,
Сох кхывола саг-м хургвар.

Гlермане, 12. Лайчил 2010 шу

уйлаяздар (да) - поэзия
ун-оалхазараш (да) - птицы несчастья
велакъажар (да) - улыбка
бlубеннар (да) - устойчивость
оакъинг (да) - стекло

Sapral Mikail
14.06.2017, 16:59
СО ВИТАЦ
уйламугlар САПРАЛ МИКАЬИЛ

Со витац сай мехка хоза ваха,
Вода со Аьприке, ваха дlа.
Ва нана, lа селлара хала са ма даха,
Хьона эгlазваха, водац co дlа.

Со витац сай лоаме а тlехьа лела,
Кемаца ва водаш со Аьмрике дlа.
Дуне - хьай доаца наькъаш хьадела,
Гlалгlайче - lадика со ваьлар йийца.

Дай гIалаш, са бlаргашка шо латта,
Оаша лораву, оаша хьеставу.
Укх наьха мехка, лелац co атта,
Дог детталу, дего саготду.

Дай лаьтташ дитад, юстардаьха,
Гlермане, са таханара цlа.
Варгвоацилга ховш да укхаза ваьха,
Дунен тlа хул е аре е цlа.

Гlермане, 08. Бекарг 2011 шу

Аьприк (йa) - Африка
Аьмрик (йа) - Америка
Гlермане (йа) - Германия

Sapral Mikail
15.06.2017, 06:34
ГlАЛГlАЙ МОТТ
уйламугlар САПРАЛ МИКАЬИЛ

Аьрзена тlехьа кхе гlийрта
Бовнах хиннар, вайна дикa хов.
Наьха кулгашца баьккха нитт а,
Боала геттара моарзалах сов.

Эрсий мотт бувц дукхагlачара,
Кlезига хеташ, цара даьра.
Ховр, шорттига дицлуш латта,
Жожагlате вага а дац атта.

Эздел, гlулакх, яхь, вай сий,
Хоарцаш латта, лоама чура бий.
Хlара саго, шийна атто леха,
Ва дарта, хьо сел чlоагlа ма lеха.

Мохк ма битабац вайна - йов,
Барт боацаш вахар а - дов.
Дешаш довш латта - йайна фос,
Гlалгlайчун куц а цун бос а.

Лелаш ва меттаза, дукхa ховр,
Баьречун кlалйиса тамашийна говр.
Гlалгlай мотт ба, мерза модз,
Вайна эшац наьха меттай цlодз.

Бувцийтa эрсой - эрсий мотт,
Хlирaшта бувцийта - хlирий мотт.
Ингалса мотт - чаме a ба,
Амма гlалгlай мотт - дукха мерзагlа ба.

Гlермане, 14. Мангал 2011 шу

дарта (да) - гриф
фос (йa) - трофей
дос (да) - дрова

Sapral Mikail
15.06.2017, 07:11
НАЬСАРЕРА БИЙСАШ
уйламугlар САПРАЛ МИКАЬИЛ

Бала боацаш санна, арабаьлар сигалбутт,
Юххера а бийса тlакхача, йaр мелаш комарий мутт.
Баьде урамашта тlагlолла, йодар наьса файтон,
Къаьна воккхсаго, ондапхьар, йеттар ший гон.

Юртий леторгаш йар, седкъаш мо, лепаш хоза.
Болхбе йисте ца баьнна, кхестар геттара моза.
Жlалеш lехар шоай мукъам, дlаболабаь,
Наькъе баьнна нах болхар, шоай илли эйдаь.

Дено lадика йийцай, ала-цlе цlаьскарца.
Бовнаш бедаргаш шоай, чарахье кийча a йаь,
Гlатта лелар уж, боадонца доттагlал лаьца,
Етта а бар боагlаш миска, туллaбенна, эгlабаь.

Гаьнаш латтар сатийна, дlатхьовса дагайолаш,
Бос шоай lаьржача ювргlа кlал, дlалочкъабаь.
Къонах вар, кхелах веха, къаракъ дика молаш,
Нахах a балex а, ший хатар, во кlайладехьа.

Бийсо ма дарра хьахьокха, ший говза кицаш.
Наг-нагахьa, ураоттийташ, духьалйаьнна мосаш.
Дара из хьалха, йора наха а, шоай бlеха куташ,
Каст-каста, хaзар а, саго сага ший топ духье тохаш.

Гlермане, 26. Мангал 2011 шу

сигалбутт (ба, да) - луна
мутт (йа) - сок
ондапхьар (ва) - кузнец
леторг (йа) - фонарь
цlаьскар (дa) - заря

Sapral Mikail
15.06.2017, 07:28
ТАРСИЙ БЕШ
уйламугlар САПРАЛ МИКАЬИЛ

Цхьан хана ахдаьккха дог,
дlакхаьлар, къа а ца хеташ.
Цунах хlанз дукхачара хьог,
ба багlаш, хала садетташ.

Совдалац лаьтта цхьаненна,
цо кхеву саг дунен тlа.
Хьа сибат, да хувцаденна,
ба тешаш къонгаш хlаьта а.

Мичча хана, хьадала a мега,
мерза дакъа, гlалгlай овла.
Белаб хьона хlирий чlега,
шо моастагlий дlа ма довла.

Вешта нийслургва, со теш,
солткъонах, майра волаш.
Пlелг хьокаш, Tарсий тlа беш,
цига даха вай ховшаргдолаш.

Сога бахьанаш ма дувца,
дагадоагlа шун Сибарена шело.
Мерза хабар, дукхачара дувца,
бакъда дувца шийдар, кхело.

Гlермане, 28. Чантар 2011 шу

Sapral Mikail
15.06.2017, 07:54
ЯНДА МУГlАРАШ
уйламугlар САПРАЛ МИКАЬИЛ

Янда мугlараш хьо деша велча,
Цара кlоарга маIан, хозале.
Цун уйлаш - гlетта дода лаьча,
Дlалоаца синош - мухале.

Хьа мугlараш, хьа халкъа ганз,
Йейзай сона дикка тахан.
Хьа уйлах кхеташвоаца хlанз,
Из йоацаш ваьхав селхан.

Уйлакаьхаташ хьа, мерза модз,
Цул мерзагlа хий мийнадац аз.
Ший майрал хьокха гlерта бордз,
Цун зовзал, зийнайац аз.

Ва Джамлада, хьа дега оаз,
Зама мел йода, йа хозаш.
Бехка баккхац тахан вlалла аз,
Вай меттай чама ва озаш.

Гlермане, 25. Мутхьол 2012 шу

Sapral Mikail
15.06.2017, 08:06
ЛОАМАН РАЬГlЕ
уйламугlар САПРАЛ МИКАЬИЛ

Лоаман раьгlе, лоаман раьгlе
Сона ма йовзза, йа са даьхе.
Башлоамкорт а, Наьсаре а,
Ма мерза хет сона шун буне.

Даймехка фу, сигала малха,
Сийрда уйла - са дега чу ма талха.
Кхайкаде эгадеш лоамаш,
Той отташ цlай дола хоамаш.

Лоаман раьгlе, лоаман раьгlе
Сона ма йовзза, йа са даьхе.
Маьтлоам а, Яндаре а,
Ма мерза хет сона шун дуне.

Гlермане, 05. Аьтинг 2012 шу

раьгlе (йa) - равнина

Sapral Mikail
15.06.2017, 16:31
ШИl ДУНЕ
уйламугlар САПРАЛ МИКАЬИЛ

Шиl дуне вlаший цхьан кхетаргдац,
Цигара говзалаш йовзаш хургвац.
Седкъаш лепаш хьа карa дадаргдац.
Хийра дунен тlа, саг ваьха а вац.

Наьха вахар тlалацa хьо ма гlерт,
Сердалон лорабе ховха барт.
Из хургбац леташ дуне мел латта,
Безам отте, цу лепаташка хатта.

Лочкъадергда хьуламаш lаламо,
Сигалбетто ший сердало мо.
Лаьттан хlайкал ма доаде, ва саг,
Хургвац доагlаш хьо бера гlа даг.

Даьржа седкъаш, сигален бай тlа,
lехаваь, lовдал, хlалак ма дайтa.
Ший дар вахаро цlаьхха дlадех,
Дунеш, caтесса, lовдалаш лех.

Гlермане, 09. Саькур 2013 шу

Sapral Mikail
15.06.2017, 16:31
СA СИНА САТЕМ
уйламугlар САПРАЛ МИКАЬИЛ

Са сина сатем, са дега паргlато,
Мичча йоайаьй аз, ха безам бар са.
Дуне тlа даим оатто лехаш мо,
Ма сиха дlадахар хьа хаоттама хаттар.

Кхалхаш латта, хоза мелла дар,
Гуйренца кхалхаш мо бунен лаьтта.
Талхаш латта, дика мелла дар,
Доаца ткъамашца хала-м да гlатта.

Хьежаш, сабар деш, даиман,
Мичча да уж сох лачкъа наькъаш.
Тешаш хилар, хьa хоза иман a,
Дика а во а хьa дегlа тlаlаткъаш.

Амма хlаьта а, ха безам ба,
Безам ба са сийрда ала a лаца.
Миска нах, уж мелла дукха а ба,
Дика саг, диканех, хьо ма харца.

Гlермане, 20. Тушоли 2013 шу

Sapral Mikail
17.06.2017, 09:11
ТЕРСА ПХАЬНАЛГАШ
уйламугlар САПРАЛ МИКАЬИЛ

Урамаш латта терса пхаьналгаш мо,
Бийсанега тешаме тархьараш дувцаш.
Дар гуш дац, доацар даиман гу,
Бlарго маlан хиннадац цхьаккха лувцаш.

Баьде бийса, баьде ди, баьде зама,
Тхьайса улла, йистахилац дуне.
Овлашца чуийца йа, онда гlама,
Догlаш делха, иззамо вай буне.

Да дог детталуш, са сира наькъаш,
Седкъаш гуц, баьде йа сигале.
Улла сатийна чурта кlала дакъаш,
Cинош лаьцар кхело - азатле.

Шира файтон йа урама тlа йодаш,
Дакъса санна къайладаьлар цун сурт.
Ва дуне, хьа цlийх йизза човнаш,
Керда вахар, цунца юха а цхьа чурт.

Гlермане, 27. Бекарг 2011 шу

Sapral Mikail
17.06.2017, 09:22
СОВДИ МО
уйламугlар САПРАЛ МИКАЬИЛ

Бисни санна, цlена йолаш,
Хьармакх санна, хоза йолаш,
Дог гlозадоаккхаш,
Самукъадоаккхаш,
Хинна йалар хьо, Совди мо.

Баьде бийсал, lаьржагla йолаш,
lаьржа дегал, къизагla йолаш,
Са дог дoхадеш,
Са са човхадеш,
Хlана хиннай хьо, хоза йоl.

Алинг санна, фаьра йолаш,
Цlелорг санна, лепаш йолаш,
Бlарг тlалоацаш,
Уйла дlалоацаш,
Хинна йалар хьо, Совди мо.

Шийла агойл, даькъазагlа йолаш,
Даькъаза батал, аьрдагlа йолаш,
Са цlий мелаш,
Пхаьнаш эттlайеш,
Хlана хиннай хьо, ийрча йоl.

Гlермане, 07. Аьтинг 2011 шу

бисни (йa) - лотос
хьармакх (да) - роза
алинг (да) - мак
цlелорг (да) - пион
агой (ба) - январь

Sapral Mikail
17.06.2017, 09:30
ДОШО СУВ МО
уйламугlар САПРАЛ МИКАЬИЛ

Поацолг санна, кlаьда,
Зийболг санна, мерза,
Малхац ловзаш,
Дагардувцаш беттацa,
Дошо сув мо,
Дига гlад - дуне.

lанжал санна, цlена,
Диваж санна, хоза,
Безам дуаш,
Къамаьл дувцаш седкъашцa,
Дошо сув сo,
Даккха сома - буне.

Тухцилг санна, тийна,
Бlаьстинг санна, кхийна,
Фаьлгаш дувцаш,
Керда лепаш догlаца,
Дошо сув мо,
Гойта хьа - дикане.

Гlермане, 20. Аьтинг 2011 шу

поацолг (да) - pомашка
зийболг (да) - фиалка
lанжал (да) - алтей
диваж (я) - рододендрон
тухцилг (да) - колокольчик
бlаьстинг (да) - первоцветник

Sapral Mikail
17.06.2017, 09:45
ВЕЗАЦ ХЬОНА СО
уйламугlар САПРАЛ МИКАЬИЛ

Ма доаде са акхал, со тешац,
Йезар, со хьона везаш вац.
Ма йувца соца lадика, эшац,
Йистахила са, безам бац.

Вита со сайга-да баьдеча тахан,
Вац со хьа баьри, дlагlо.
Дезац хьона, цхьаккха бахьан,
Кхоана йицлургйa сона хьо.

Хьа безамо хийцар ший амат,
Цхьа бирсо йар lехаш аьрзи.
Хьогара дайнадацар сона ниlмат,
Къахьо дар, безаман хий.

Поал хехкаро дега чу хьожаш,
Хьаоал бакъдар, хьо ма теш.
Амма со ва-кх тахан водаш,
Хьона йуташ хьа ямарта беш.

Пlаз эттар вай гуйре дlайоалаш,
Са сабар, садеттар, дeхад.
Йа бийса вай маьлхара йоалаш,
Аьлдито, бузабу вай кад.

Ма доаде са акхал, со тешац,
Йезар, со хьона везаш вац.
Ма йувца соца lадика, эшац,
Kъамаьл де са, безам бац.

Гlермане, 10. Лайчил 2011 шу

Sapral Mikail
17.06.2017, 10:01
ДlАЙОДА СИХА ХАНАШ
уйламугlар САПРАЛ МИКАЬИЛ

Ма сиха дlайода уж ханаш,
Цхьаккха сабаре доацаш.
Ма гаьна лела уж гlанаш,
Цхьаккха кхоане санна йоацаш.

Ма удда шо денош - сихха,
Са сахьаташ сиха а доахаш.
Ма маьлхара хьежа са миха,
Хlанз ираз да лаьтта чу оахаш.

Ма лечкъа са бирса бийса,
Аз човхадергдац хьа са.
Вац хьежаш майра, нийса,
Дlайaхар са тlеххьара ха.

Ва lоажал, хьо селлара бирса,
Ма лела сона тlехьа, ма кхе.
Тишадалар хьа шира гlирса,
Са денал а, lа човха ма де.

Гlермане, 03. Мутхьол 2012 шу

Sapral Mikail
19.06.2017, 11:08
ДА ВОАЦА ТlЕХЬЕ
уйламугlар САПРАЛ МИКАЬИЛ

Кхийнад хьал бераш зlамига сиха,
Фусам латта цара, ший бос хийца.
Доаккхар берашта дас хийла нихь,
Тахан хиннад цох lаьржа кица.

Да-м веннав, къаракъо вохаваь,
Бераштa кепигаш мара ца дуташ.
Вахар из, баьде каша чу дlа,
Йуташ царна шийх йисса къурдаш.

Наха-м оалар царeх тlехье хургйац,
lаьржа, даькъаза хабараш дувцаш.
Нанас оалар, сатох, хlамa дергдац,
Вай йиш йац наьха нахаца къoвса.

Бераш кхийнад хьал, ха ца зувш,
Хоза къонахий, денал долаш.
Ба уж нахаца тахан дика товш,
Цlеначa нигатац, догцlена долаш.

Гlермане, 09. Тушоли 2012 шу

къурдаш (йa) - хлам

Sapral Mikail
19.06.2017, 11:27
ТlЕХЬАЙИСА ГУЙРЕ
уйламугlар САПРАЛ МИКАЬИЛ

Мlадхишта тlагlолла чакхавоалаш,
Ва водаш со чlоагlа эсало.
Зизаш теха латта, гуржий боалаш,
Цхьа тамашийна лепа сердало.

Буц тlайаьнна, латташ да такаш,
Дlайалац са хинна, эгlазло.
Во эттар мел доа - керда наькъаш,
Ва латташ цецваьнна, аьсало.

Да оалаш, дуне чаккхе йоацаш,
Со тешацар, lовдало вар.
Сурташ да дега чура хоарцаш,
Са селханара денош соца дар.

Хоза йар уж, ший тайпара ханаш,
Са вахар мел хала, хиннадале а.
Вар гуш со цу хана дукха гlанаш,
Меллара кхийнагlа тахан вале а.

Ловза хьо дегаца къаьга lуйре,
Нидз бац латкъа, дош оалургдац.
Наькъа тlа сацай, тlехьайиса гуйре,
Хlанзчул тlехьа со а вlалла сиха вац.

Гlермане, 10. Тушоли 2012 шу

мlадхиш (дa) - лужи
такаш (дa) - тропинки
эгlазло (йа) - обида
аьсало - смиренно

Sapral Mikail
20.06.2017, 07:04
БИСНИЙ ЗУРАМ
уйламугlар САПРАЛ МИКАЬИЛ

Чинхий кицо оалаш санна,
Мух боацаш талгlеш а хулац,
Цу тайпара довзалгаш денна,
Наькъа йисте вlалла уллац.

Ды мо тешаме доттагlа хилча,
Везац кхера аьлех а вlалла.
Бийсано цlаьхха наlараш къайлча,
Кхестаргба во даиман бала.

Бисний зурамо ший тайпара,
Дека иллеш, гойта седкъаш.
Латта дунен тlа ший тайпара гlар а,
Нах а чlоагlа кхераме цкъаза латкъаш.

Ма ховргдац, дукха бала а бац,
Денош тешаме, дlаухаш санна.
Тархьара оаламаш довзаргдац,
Безаман тlаьш цкъаза дехача санна.

Гlермане, 19. Тушоли 2012 шу

чинхий - китайский
аьли (да) - пропасть

Sapral Mikail
22.06.2017, 11:15
НАЬСАРЕРА ЦlЕРПОШТ
уйламугlар САПРАЛ МИКАЬИЛ

Цlерпошт хьайоагlа, цlерпошт дlайода,
Вазгален вахар даиман кхехка.
Тахан сай мохк буташ, вода,
Са са тахан ший тайпара делха.

Лайчило хьекха, ший ямарта михаш,
Бордз lехаш санна, теlадеш дог.
Малха кlала нах-зунгатий санна,
Боанго цкъа лаьцач, дlахецац юха ког.

lадика йувца лоамашца, lадикa,
Са унзара кхоане, ма де соца къамаьл.
Са Наьсаре, дог са, седкъаш дlакъовла,
Са берален боагабеш цlера чу га-овла.

Хьо вахар, сел даькъаза, селлара ийрча,
Ма тамашийна ловза хьо - тха кхел.
Вац велхаш, вац кадаш, вац леткъаш,
Селлара бирса хlана хьувза хьo - къел.

Гlермане, 26. Тушоли 2012 шу

цlерпошт (йа) - поезд
лайчил (ба) - ноябрь
ямартa - изменчивый
боанг (йа) - капкан

Sapral Mikail
26.06.2017, 09:48
АЙПАДАЬ ДОГ
уйламугlар САПРАЛ МИКАЬИЛ

Кlорапаш хьай, хий чу ма кхосс,
Баппаш а цкъаза тамашийна делха.
Бlаьстено хувца йоачанца бос,
Klоарга хинна овлаш а кхелха.

Тамашийна ба, ба унзаре мохк,
Ма баьде хета, укхазара седкъаш.
Тамашийна да, да кхераме дохк,
Ма маькара хул шун сурталгаш леткъаш.

Аз-м хlама яхац, вац со хьога лувш,
Айпадаь дега, диц новкъостал жайнаш.
Йирзанза човнаш даггара lувж,
Йовза йезаш йа хlара сага ший гlайнаш.

Хьо тlехьа йисай, йисай хьо тlехьа,
Сацад са сахьаташ, уж лелац.
Хьо тlехьа йисай, да деррига тlехьа,
Садахар а дац, буне а баш делац.

Гlермане, 27. Тушоли 2012 шу

кlорап (йа) - венок

Sapral Mikail
27.06.2017, 17:01
МАЬЛХАРА ЛИЛИНГАШ
уйламугlар САПРАЛ МИКАЬИЛ

Ма маьлхара хьежа, лилингаш хьа,
Хьа бекарга бlаргаш, хишца хьалдизза.
Уйлакаьхаташ, уйламугlараш са,
Са зовза бутт, лепа сигала тlа бизза.

Рувгlаро гаьна кlала диц кхы къамаьл,
Сайцай маьшенаш, сайцай файтонаш.
Аьсало декъай дlа камаьршала маьл ,
Дега тlагlолла лелаш да ирра гlонаш.

Гlермане, 09. Бекарг 2012 шу

лилингаш (да) - сирень
бекарга - майский
рувгlар (йа) - шопот

Sapral Mikail
28.06.2017, 10:59
ЦКЪА ДЕНОШ А СИЙРДЛУ
уйламугlар САПРАЛ МИКАЬИЛ

Петар кхеста михай - аьтинга лоа,
Нани йаьгlа йелаш, вайх хетаpга.
Да зlамига бераш ловзаш юха коа,
Цlе буне хилча, фу эш дега.

Ираз дайна Наси мо, юха а лувш йа,
Даьр ца даьр детташ тlехьа юха иттаза.
Нани-м вайг кора кlала ладувгlаш йа,
Кхоанега ший хьежаш цхьа, кхайканза.

Дошлоацорг мо, ма тамашийна безам,
Цу тайпара ха вlалла оттарг а йий.
Цкъа денош хул хьаотташ хьа къиза,
Чам боацаш xeтaлу мелашду йий.

Вешта вахар атта, баш мерза хетац,
Хало ца йайзач, ваха а кордлу.
Хила мег, хьа денош, тахан тlалетац,
Бакъда ха йоалаш уж а сийрдлу.

Гlермане, 10. Аьтинга 2012 шу

михай петар (я) тополиный пух
аьтинга - июньский
дошлоацорг (да) - энциклопедия
йий (да) - пиво

Фатима
01.07.2017, 09:57
Удивительно талантливый парень

Sapral Mikail
05.07.2017, 12:23
Удивительно талантливый парень
Баркал. Даьла раьза хилва хоза дола дешаш аьнна долаш.

Sapral Mikail
05.07.2017, 12:24
СИХА МА ЛЕ
уйламугlар САПРАЛ МИКАЬИЛ

Сиха ма ле ва кlанат, сиха ма ле,
Къавала кxоавергва хьо, ваха а.
Во дош ала ва кlанат, сиха ма ле,
Аьлча отта цун цlаьхха беза маха.

Наlалт ала дунена, сиха ма ле,
Эгlаза ваха бlехача, къизача наха.
Воккхагlачунга ладувгlаш, юха ма ле,
Дийнат тlехьа гlерта дунен тlа даха.

Сиха ма ле ва кlанат, сиха ма ле,
Сихаденнача циско а, дахка ма лацац.
Сардам баккха ва кlанат, сиха ма ле,
Воча сагаца мерза хабар, кхыдар тоалац.

Нийса хила гlерташ кlанат, сиха ма ле,
Гlалат далалца, бокъо йовзац вlалла.
Дехке ваьле кlанат, сиха ма ле,
Хийрача мехке, черсий ды дlалалла.

Гlермане, 16. Аьтинг 2012 шу

Sapral Mikail
05.07.2017, 12:46
ЙАЦ ГУЙРЕ ИЙРЧА
уйламугlар САПРАЛ МИКАЬИЛ

Ма чlоагlа къувкъа таханарa дlи,
Сигалара делхаш мо сира хий.
Кхерайенна lехаш мо миска барни,
Хиво дохадаь, латта хlанз вай тlий.

Ва, хьо ма хьежа, сел унзаре,
Иштта-да гlанаш тхьагlардаха.
Човха ма йе, са маьлхара ареш,
Из доацаш а зовза хьаэттар са ха.

Во дош ма ала, дицлац из ханахь,
Мух lехаш санна, во lимад ду.
Сомавоал саг унзарваьнна гlанах,
Доаца дакъсинош цун беша ший гу.

Ма леткъа, йац гуйре ийрча,
Цун ший тайпара да лепаш ди.
Хьоца къаста дlа ва со а кийча,
Дукха йаха, шорттига къовла cа ниl.

Гlермане, 01. Кlимарс 2012 шу


барни (йa) - ягнёнок, оставшийся без матери
тхьагlардаха - задремавшие
дакъсинош (да) - души (мертвых)

Sapral Mikail
17.07.2017, 13:30
КlИМАРСА МlАД
уйламугlар САРПАЛ МИКАЬИЛ

Хьа зовне оарц, матардахад,
Оалхазар а дагlа сатийна.
Догlо йитай ший кlимарса мlад,
Хьежаш да ахка вай кхийна.

Буне, хьа дувхар, ма маьлхара,
Чамза хьаэтта хьа денош.
Бийсаш а тlехьа ма цlимхара,
Даьссаденнад тархьара цlенош.

Даьсса дуне, баьде аре,
Саг воацаш латта шун пурни.
Укхазa вlалла адам даларе,
Селлара лургйацар тиша хоамни a.

Гlермане, 26. Кlимарс 2012 шу


кlимарса мlад (йа) - июльская грязь
пурни (йа) - пекарня
хоамни (йа) - почта

Sapral Mikail
17.07.2017, 14:16
РУЗКЪАЦАРА ДОТТАГlА
уйламугlар САРПАЛ МИКАЬИЛ

Хьо эшаш, са гlулакх ма отталда,
Ва доттагlа, lа дайзтар хьай куц.
Вац эгlаза ваха, хьона ма мотталдa,
Xlаьта тамашийна хета хьа сина буц.

Маьшенах хьай йоккха хlама хеташ,
Хьо лелаш ва чlоагlа сонта а ваьнн.
Хьона сигалера леторгаш лепаш,
Бутт эхь хеташ улл юстара а баьнн.

Хьо моргга хиннаб бовзаш шортта,
Во дош ала - хьо сиха ма ле.
Ма лестабе хьай боккха корта,
Дика воацилга ва ховш a со се.

Са ма отталда гlулакх хьо эшаш,
Хьа lаьржа юхь йовза - безам бац.
Дайнад доттагlа доттагlа везаш,
Рузкъаг хьежашвоа - новкъост хиннавац.

Гlермане, 31. Тов 2012 шу

Sapral Mikail
18.07.2017, 13:56
КlАЙМАЦ МО
уйламугlар САРПАЛ МИКАЬИЛ

Ларма чу улла къайла уйлаш,
Кlаймац мо уж гlоттаргйа.
Цу тайпара хlамаш хул хулаш,
Безам - кlай кlормацаш да.

Царга ладувгlал со хилча,
Метта чlега сиха болларгба.
Миска гlанаш са гаьнадаьлча,
Тlехьахьежаш царна - со хургва.

Замано йоахаргйа кlоарга секаш,
Ер дуне тамашийна хетаргда.
Ираз долаш вар ва иллеш декаш,
Хlаьта хьоца даиман уйлаш йа.

Гlермане, 12. Лайчил 2012 шу


кlаймац (да) - крушинница, лимонница

Sapral Mikail
21.08.2017, 14:22
ДОГ МА ЧlАХКА
уйламугlар САРПАЛ МИКАЬИЛ

Саго лийхар - корадергда,
Меллара духьаленаш наькъа тlа латте а,
Герга долга дуне, бакъдар да,
Къайла бlаргашца лела хьо ца отте.

Йоайаь ха, цхьаккха пайда боацаш,
Кхелах лечкъар, lовдалца тар.
Цхьа менот сапаргlато йоацаш.
Сина тlа соцаш хьа, яппара гlар.

Миска саг, сел хьо даькъаза валар,
Укх дунена ма чlахка хьай дог.
Сагий тамашийна хет даим кхалхар,
Сиха ма ле, шорттига ловза хьай ког.

Гlермане, 13. Чантар 2012 шу

Baffy
20.02.2018, 21:43
Бераш а гунахь ма кхесташ бар.