-
Хийра поацолг
Еза со яхаш, Iа ма лейе,
Поацолгаш ма кхахьа хьа.
Са дог хьестадеш, ма тейе,
Хабараш даьсса эшаш дац хьа.
Хьайех баьри дото хеташ,
Куро хьежаш тIа, ма лел.
Овдала яц, я со дика кхеташ,
Хийра волаш, со йолач ма вел.
Сай дог долаш, я со зIамсаг,
Со Iехае ма гIерта хьо.
Я со эздий тайпан кхалсаг,
ХIаьта мискачарах ва хьона хьо.
Хьожаргьяц со корах ара,
ГIоттаргьяц тайжа набарах яьнн.
Сона хургвац хьох майра мара,
Леларгва хьо даим гаьна.
Дезац поацалгаш хьа ховха,
Хьо а везац сона, дIагIо.
Iехаш я юха дега довха,
Де сона дац хьа а цхьаккха гIо.
Номаче, 26. Нажгамсхой 2013 шу
хийра - чуждая
поацолг (да) - ромашка
леде - обмануть
теде - успокоить
тайжа - спокойный
довха (я) - улар
-
это как же хорошо надо знать ингушский язык....спасибо!
-
Йода кхычунга маьре
Йода, йода маьре кхычунга,
Дог диссад са беша хьа.
Хала елаш хьежа со цунга,
Са бIаргашк латтар да сибат хьа.
Везаш хиннар хьо ма вара,
Хьона ма декар аз ховха иллеш.
Вай дог-уйла цхьа тара,
ХIанз сох хиннар я наьха неш.
БIаьсти къиза дог са човхадеш,
Кeрар ваккха хьо гIерташ дIа.
Къайла дане бIаргахиш Iоадеш,
Шорттига хеца веза хьо дIа.
Йода, йода маьре кхычунга,
Ма хала да из кхела ла.
Безама дош ца оалаш сайчунг,
Наьха везараца езаргья та.
Зизаш матардоалаш, денош
Ухаргда дог лаьгIадеш са.
Коа са ловзаш дукха бераш,
БIаргаш гуш хургда сона хьа.
Номаче, 16. Мутхьол 2013 шу
-
Гуйрен фиан
Фиан тIа бIаргатIадамаш легадеш,
Ма къиза мукъам лерга кхета.
Шортта бIаьстеш тешамац оаеш,
ЦIен хозале тахан Iаьржа хета.
Цун кхы йола теник еза хIанз,
Безаман хьармакхаш сира йокъ.
Укх вахараца хьо даиман Iаманз,
Ма тешаме хиланзар мерза шокъ.
Ва дог, ма хила сел кура, сонта,
Ва дуне, ма хьежа сел унзаре.
ДIахо яха нидз лохаргба аз,
Дагаюхаргья цун юха а Наьсаре.
Аз бутаргбац терканза бала,
КIезига-дукха лаьгIалургба ала.
Теник а хулац тикачар санна,
Хинна бераш да вай, къаданна.
Фиан тIа бIаргатIадамаш легадеш,
Моажа чокхий сайна тIадийха.
Дагах гуйрен сурташ юха а деш,
Хьо цIаьхха безаме дагавийха.
Номаче, 02. Аьтинг 2013 шу
фиан (я) - фортепиано