ГIалгIай йоI

Курра со́гахь хьо хьахьажача,
Са дог ло́вза доал.
ГIалгIай йоI, хьо е́лакъажача,
Уйла михьар йоал.

Готтаву со хьа хьажаро́,
Сина ба́ла бу;
Сай доалахь хьо цахиларо́,
Дега́ Iаткъар ду.

ХIаний хьо ишта хийраювлаш,
Селла курал еш?
ЧIоагIа лов со́на, дагавувлаш,
Хьо́ца хила Iеш.

Са ма дий са а́радувлар,
ГIийла узам бер,
Селла ба́лане со кхувлар,
Дега́ Iа́зап дер.

Курра со́гахь хьо хьахьажача,
Са дегI зувза доал.
ГIалгIай йоI, хьо е́лакъажача,
Дегах а́ла боал.

Коазой Аслан