…Ший халхарца тамашийна хоза товш, айдаьча кулгий коараш феца мело ловзадеш, тайжа йодар йоI, кер ходенна хьежача кхокхо мо корта кIеззига оагIора а билла. Ший дIайха, лоаман цIий лелача къонача маьжений низ а, кадайлал а дIа ца хецаш, юха детташ, «бартах кара бола», яхаш, кхокханна тIехьа даьнна, айдаь низ бола ткъамаш а долаш, дода лаьча мо, водар зIамига саг йоIа уллув цхьа гIа тIехьа а волаш.
«Хьайна товчча гIо, бакъда, со тIехьара-м даргдац хьона», яхаш дола лаьча. Кхокхо го боаккх ший сихача тайжача боларца. ШоллагIча гонах ахангахьа кхоачч. Лаьчо, ткъам духьала а тассе, никъ бехк цунна. Кхокха тIехбала хьож, лаьчо духьала а даьле, никъ дIалоац. Кхокха латтача ах го а баьккхе, юхаберз. «ТIехьашкахь а бац хьона никъ», аьле, цига а лаьча духьалъэккх. Латтача халхар ду кхокхо, лаьчо цхьаннахьа а никъ ца луш. Кхокха курра корта а айбийя бIарахьож лаьчана. «НизагIа масса а са никъ бийхкалга дий ер?», йоах цIаьхха цу юкъа майра хьежача цун бIаргаша. «Болле, болле, сона дезац хьоцара эгIилга, хIаьта а баха моттиг мичай хьа, сона кара ца боагIаш!», оал лаьчо, цо юстара а ийккхе никъ мукъа бутт. Кхокха гIозбаьле ший новкъа хьад. ТIехьара къастац лаьча а. ХIаьта цхьа го баккхалехьа юха а цIий дIайха долча лаьчан са тец, кхокха ше карабаллца ловза. Цо «карабола» аьле, ткъам духьала тосс. Кхокха сацац. Лаьчо юха а духьала ийккхе, никъ дIалоац. Кхокхо латтача го боах, дIабаха хьож. «Бахача а, баьннача а, кхы дIахо никъ бац хьона», яхаш, лаьча ткъамашца кхокха чувхабеш гонахьа хьовз. ТIаккха, тхьовра мо куралца доацаш, безамерча бIаргашца кортаберзо кхокхо бирсденна гонахьа даьннача низ болча лаьчангахьа. Цун бIаргашкарча цIера ала цIаьхха лоаладийя, хий санна, Iодохийт лаьчан цIий кхехкаш дола болата дIайха дог. Низ бола ткъамаш шортта Iо а хийце, «болле хIаьта, са хьамсара кхокхилг, никъ мукъа ба хьона», аьле, юха тIехьа долалу лаьча…

Чахкиев Капитон "Моакхаза лоамаш"