В1овнашке язъяь стихаш
Наркаш* - хьо санна - 1ажаг1а.
Декадеш аьли*,
вайна духьала 1одоаг1а
Г1улахьи г1аьли*.
Укх сахьате гучаергья
кхоллама тамаш -
В1овнашке. Хьо амаг1ъяргья:
т1адаргда ткъамаш, -
г1оттаргда вай шиъ сигала -
г1алаш т1а дергда:
к1ала да 1одода Г1ула
тай мо хетаргда...
1очухьежаш дахаргда вай,
б1огора ухаш.
Б1арг ма кхоачча - баьццара бай.
В1овнех* хьерч морхаш.
Морхаш ухк хьа б1аргашка а,
г1аддаха, леп уж:
гу сона цар чу к1ай шак1а*,
ц1ераш я баппаш*...
Кулг т1оададу хьа мосаша,
шийла да бордаш, -
гуйран маьлха з1анараша
хьанна доах барташ?
Малха тийкъаб вай дай хьалха,
малхага ихаб.
Малха гаргал хилар духьа
г1алашка баьхаб.
Цудухь йиллай В1овнашке а
сел лакха фе* т1а...
Малх - г1алг1ачун в1ови кийи,
цун уйла, фета.
Аз-м безам а малхаца бувз
(малхаш да хьо-со).
Маьлха дошоча таьшца* бувц
хьа керта хьоаса*...
Наркаш - хьо санна - 1ажаг1а.
Гуйре хьо санна.
Хьай хайра* - маьлха тамаг1а* -
тел 1а х1анз сона.
• наркаш – облепиха
• аьли – овраг, пропасть
• г1аьли – олово
• в1ов – боевя башня
• шак1а – мрамор
• баппа – одуванчик
• фе – 1.чуткий, бдительный; 2.воздушный
• таьшца от «тай» - нитка
• хьоаса – 1.узор серебряных или золотых ниток; 2.волокно, кукурузные рыльца
• хайра – 1.благо, добро; 2.незначительный
• тамаг1а - тавровый