Даьхенга
1а со везаш теркаварах,
1а со низ бенна кхеварах,
Дув буъ аз хьона
Хьа га ца хувца,
Дош лу аз хьона
Хьа сий ца дохка.
1а дуне сийрдадаьккхандаь,
Са дог, са б1арг г1озбаьккхандаь,
Дув буъ аз хьона
Хьа га ца хувца,
Дош лу аз хьона
Хьа сий ца дохка.
Езача йи1ий б1арг санна,
Ваьча наьна дог санна,
Хьо лорае дув буъ аз хьона.
Сийдола, ва са даьхе!
Хьалха
Коа т1ара коа т1а ювлаш
Къел лийннай лоамашка,
Лоамарочун са 1увдаш
Бала лаьттам дегашка.
Хьанна дицлургда,
Г1ийла шок етташ,
На1арах чухьийкха
Из шийла дарц,
Чехко йорт етташ
Гув йисте 1ийха
Меца борз,
Хьанна йицлургья?
Коа т1ара коа т1а ювлаш
Къел лийннай лоамашка,
Лоамарочун са 1увдаш
Бала лаьттам дегашка.
Ма хетта
Ма яха сога, ма хетта
Хьа даьй фу деш хиннаб,
Лоаман довкъашка фетта
Уж хьанна к1ийлен ихаб.
Уж бац картех букъ хьекхаш
Наьха кхуврча хьийжарех,
Е адамий рузкъах хьегаш
Атта лаьтта баьхарех.
Уж лийннабац коашка ухаш
Юрта ж1алеш 1ехадеш,
Е дер дайна, 1ийне бувлаш
Чокхе ткъамаш лестадеш.
Са даьй баьхаб хало-оатто ловш,
Гота, мангал леладеш,
Лаьтта шозза ца бахийлга ховш
Шу беркатте увттадеш.
Уж ба вурийтталаг1ча шера
Моастаг1ан духьал лаьттарех,
Молха к1урах ца кхераш
Лоам чу бокъо яьккхарех.
Ма яха сога, ма хетта
Хьа даьй фу деш хиннаб,
Лоаман довкъашка фетта
Уж хьанна к1ийлен ихаб.
Дела, ловза
Делаш, ловзаш духьал ух денош,
Вахар да седкъа санна хоза.
Со а лел вахар хестош,
Ма ма могга хозъеш сай оаз.
Са дега илли, ловза, дела!
1а г1адбига, г1озбаха са нах,
Хьо оалхазар хиле лела, -
Баь варгвац со хьа мах!
Чуг1аг1аьра санна хоза хила,
Дега чура г1адваха аргда аз:
"Даьд оах Октябра тхов к1ала
Цу малх санна хозача нанас".
Лоамашка
Шун хало,
шун оатто
Дилла са дег чу
ца лаьттача,
С вахар а
дош дац,
Фуннаг1а дарах,
миччахьа леларах,
Шоана ца вийзача,
Се хьанна везаргва
сона а хац.
Лургъяц даьхе
К1айи хозеи гучахь дувцаш,
Уж б1еха дегаш чудехка,
Михо санна шоай никъ хувцаш,
Ц1и тоха доахкар шо мехка.
Б1ехалашта кара даха,
Даьхе моастаг1ашка ехка,
Моастаг1ий сийна ц1и теха,
Довла г1ертар шо тха мехках.
Цу къаьнача пхьарах тийша,
Газа можага ладувг1аш,
Доахкар шо болх бе тийша,
Бертий мо даьхен т1а хьувзаш.
Б1ехалаш, дезац шо дега,
Шо цхьанна х1аман маьхе дац.
Б1аьсти хиш мо ц1еш 1оъахийта
Яьккха даьхе оаха шоана лургъяц.