Албаков Мурца1ала Джабраьил (Албаков Джабраил Мурцалович)

Ва тха ноаной...

Ва тха ноаной, г1алг1ай истий,
Ва тха беза йижарий,
Малаг1а хоржаргба аз бустам
Диста низи хьинари?!

Малаг1а бустам? Дунен йисте
Вохалургва шугарчул
Дукхаг1а доацаш оза, диста
Дега й1овхал, къонахчал.

Дийца варгвац со шун денал,
Дикал оза тараз дац,
Хозал? Ц1аккха шун хозленах
Цкъа шо дайнар вицлургвац.

Кхуврча доахке сискал йотташ
Шо юххера жуврах яь,
Новкъост воацаш улув отта
Кхай т1а гота доахке цхьаь,

Мар е воша накъавоаккхаш
Т1ем т1а, хьанна хов: ваха? ве?
Е во1 кхийна накъавоаккхаш
Шоай эскаре г1улакх де,

Е уж байна хатар доаг1е
Дегаш ц1ийла керчадеш,
Е юххера наьна оаг1ув
Лаца кхелла шоай во1 леш,

Корта 1о чу ца бохийташ,
Дог ца дуллаш дуненах
Чакхдувл шо, тха ноаной, кхийте
Вахарцара халонех.

P.S. А как будет звучать фамилия Албаков на ингушском?

Нана

Во1 ц1аварга хьежаш,
Валарах ца тешаш,
В1ашкайихьа хано,
Сона йовз цхьа нана.

Сона йовз цхьа нана,
Бешлоам санна къаьна,
Т1ема 1аьржача лихьо
Юххера во1 вихьа.

Т1ом сецачул т1ехьаг1а,
Кхийнай б1арча т1ехье,
Т1ема хана баьраш,
Шоаш ба кхедеш бераш.

Ви1ий т1ехье кхийнай,
Вахарца д1аийнай,
Шоай да ца гуш дийна,
Да фашисташ вийнав.

Хано боабац тешам!
Нана яг1а тешаш,
Нана хьежаш яг1а,
Массанега яхаш:

- Гов к1аьнк тахан, ваг1ац,
Воаг1аргва их кхоана.
Иштта хьежаш баг1а
Миллионаш ноаной.

Наьна кулгаш

Уж кхелладац
т1ем т1а накъавоахаш
Ви1ий дегах эгаш хьерча.
Уж кхелладац
шоай ц1е шонкаш* йоахаш
Кхеваьча во1а тега мерчи.

Наьна кулгаш кхеллад
нус чуяха.
Несий карара ийдеш ви1ий бераш ага дехка,
Ага теркош яг1аш
Царна вахар, дега й1овхал тела.

*шонк - мазоль

Г1алмистера мехкарий

Дешаш бале, бале балха,
Ловзар долча бувле халха,
1аьрж доллала во деча а,
Шоаш ма барраш - эздел, сий -
Уж ба, ховлда шоана, ховлда,
Г1алмистера мехкарий.

Еррига аре сийрдаяьккха,
Шун са парг1ата а даьккха,
Духьалбоаг1е белалий,
Уж ба, ховлда шоана, ховлда,
Г1алмистера мехкарий.

Хьоа кхехкал д1айхача дийнахь
Доаг1аш, балха-така лийнна,
Шоаш дахьача хих, 1аббалца,
Моладойя шийла хий,
Уж ба, ховлда шоана, ховлда,
Г1алмистера мехкарий.

1о-хьа т1ехбовлача хана,
Тохадолийташ шун пхаьнаш,
Дунен хознеш дагаеха,
Кхехка долалойя ц1ий,
Уж ба, ховлда шоана, ховлда,
Г1алмистера мехкарий.

Сона-м хац вай юрташ мишта хургьяр

Сона-м хац вай юрташ мишта хургьяр
Вай юрташка къоаной бецаре,
Сона хац сай вахар мишта хургдар
Царгара хьаькъал хьа ца эцаре.

Мехка довна, тоама, таьзет долча,
Е саг йодаш-йоаг1аш хьолчаг1а дой,
Массе хана латт уж халаг1йолча,
Къахьа, мерза дайна бола можлой.

1урра-сарахьа, ц1ен хьалхашке, маьлхе
Баг1аш хул уж т1ехкаш й1охъеш.
Гаьнара се ц1авоаг1аш, эггара хьалха
Со уж массаза санна баг1ий хьеж.

Баг1е, юрта воаг1а со сатийна,
Баг1е, юрт зулам доацаш ях,
Баг1е, сона хов, ба маьрша-дийна
Юртара са бовза, беза нах.

Баг1е, хов, дика-во иккхача
Са дика-во дийкъа, лаьрх1а шоай,
Сога санна са коа дакъа кхаьча
Латтаргба уж къоаной-юртахой.

Г1алг1айче, хьо еза сона

Г1алг1айче, хьо еза сона,
Во1а нана езаш мо,
Гаьнга, гарга, дикан, вона
Хьоца дакъа ду дего.

Еза сона г1алг1ай лоаме -
Г1алг1ай, в1овний бирса мохк,
Хьаьна наькъах Тийрк докхош йола
Бешлоам т1ера х1ара морх.

Деза сона ораш, аьлеш,
1арам, Эсса, Шолж, Г1алми,
Форд мо терка ялатий аренаш,
Кура г1алгаай - вежарий.

Еза сона Ачалкхенаш, Маг1албике, Наьсаре,
Жовхьар - Г1алмисте, со кхеваь,
Вахар дарий шо ецарий?!

Беза сона пехка фо мо,
Чкъаран эшаш санна хий,
Мехка сибат хувцаш боахка
Г1алг1ай ховха мехкарий.

Корта бетталбеза хано
Лоа мо к1ай баь къонахий,
Дог мел детталу цу къоаной
Сий дича, хац даь вергвий.

Г1алг1ай ноаной беза сона,
Сох кхетаргвац цар ца ваьр.
Г1алг1айче, хьо еза сона,
Со се г1алг1а воландаь.

Ваха безам ба са

Ваха безам ба са наха
Сайна мога г1улакх деш,
Ваха безам ба са, вахаш
Сона къаьга сигале эш.

Сона лов малх ший лакхера
Ца хьежалга мукхбиаь,
Бера - ираз дола берал,
Ноаной - къонгех дог 1ебаь.

Лов, "т1ом" яха 1азапера
Дош кхы лаьтта ца хазар,
Т1емах дег чу бесса кхерам
Наьха дегаш ца лазар.

Т1ом ба - жерал баг1а истий,
Т1ом ба - даьй т1а боаца бой,
Т1ом ба - лаьтта 1аьхар диса,
Човнаш хинна леша т1ой.

Т1ом ба - ц1еша диза зизаш,
Т1ом - ха яха мехкарий,
Беха к1ант1ий боацаш биса,
Яга юрташ, ц1ий, ц1ий, ц1ий.

Бехк ма билла...

Бехк ма билла,
Воша, йиша, нана,
Бехк ма билла 1а а, са къаьна да,
Шоана эггара эшаш волча хана
Со хиланзар шаьлла пайда ба.

Уллув отта воша вац вешийна,
Со тешшаме оаг1ув бац йишийна,
Со хьалкхеваь вола сай из къаьна
Да 1охоаве г1онча вац со даьна.

В1ашаг1кхийттача исташа д1а-хьа ийдеш,
Къонгех деш дола къамаьл хьаийца,
1а, са нана, йоаккхаргьяц йоаккхийеш
1айха хьалкхеваьча ви1ий ц1и.

Бехк ма билла, нана, бехк ма билла,
Беша зиза кхувш мо хьал а кхийна,
Гудар мо виссав со тахан алла,
Гунахь доацаш хилар мара дийна.

Бехк ма билла, нана, бехк ма билла...

Со кхер

Со валарах кхерац - массанега
Хана й1оахала кхоачаргда из цкъа,
Къелах кхераш вац со - ц1аккха ч1ега
Боллал д1аьхий хинна дац са ц1а.

Со лазарах кхерац - х1анзле лайнад
Аз ца кхеррал бе-бе лазараш,
Балхах кхерац - балха чам а хьайнаб,
Вохаргвац со кхаъ хазарах.

Укх дунен т1а со кхера эггара ч1оаг1аг1а
Кагъеларах сай вахара соа -
Се вицвенна, доттаг1ий ца боаг1аш,
Бай баларах со вахача коа.

Ма эшалда шоана...

Маг1а баьрчче - ага,
1аса - на1ар йисте,
Хьажаюкъ - сийрда истий,
Сийнача сигалара боага
Вахар тела малх,
Ма эшалба шоана,
Дегаш ц1ена нах.

Хьаьнала къахьегаш
Нийсса ваха воша,
Наьха мерза дош,
Лоалохочун бешах
Бещ къоастае карт,
Дезала юкъе барт
Ма эшалба шоана.

Шоаш кхийначул т1ехьаг1а,
Къаьнабарий къонал,
Ноаноша даь ноанал
Лоарх1аргдола т1ехье,
Коа т1ара наьха лар
Хаьда хьаша вар
Ма эшалба шоана.

Вахаш эггара
Къахьегамацара дира
Хьоцарцара ираз,
Ца бовш наьха тешама
Лаьтта шоаш мел даха
Ма эшалба шоана
Дегаш ц1ена нах.