Юрто къаръяь кхалсаг, цо къардаь шайт1а

Селлара во хиларах, юртахоша цхьа барт баь, эккхаяь д1айодаш хиннай цхьа кхалсаг. Цу юртарча наха барт эг1абе, юкъе ц1ур бола, дезалаш цхьоаг1онах баьха царех деладала, бер делхадаь наьха дог дохаде додаш хиннад шайт1а. Юртал арахьа в1ашаг1кхийтаб уж: кхалсаги шайт1еи (хьалхарча замалахьа шайт1аш наха гуш хиннад, йоах).
Шайт1а хаьттад сесагага:
- Фу леладу 1а?
- Со д1айода укх юртара.
- Фу дар цу юрта?
- Ворх1 ж1али доаллар цхьан зунгата ког буаш.
- Ай, ма з1амига хиннад уж ж1алеш?! - хаьттад шайт1а.
-Тенна хиларах, цхьане ши устаг1а буаш дар уж, - жоп деннад кхалсага.
- Ай, ма з1амига жа хиннад уж!
- Лакха хиларах, сага кулг хьал ца кхоачаш, дар уж жа, - аьннад кхалсага.
- Ма лоха хила веза из саг!
- К1оарга хиларах, г1ув чура хий, 1очукхайда, хьалъэцаш вар.
- Ма т1ехига г1ув хиннай из! - цецдаьннад шайт1а.
- 1уйрана 1очукхесса кхера сарахьа мара 1очу ца кхоачаш, к1оарга ма яр из г1ув.
- Ма лоаца ди хиннад из!
- 1уйрана д1алаьллача 1асилгах, сарахьа етт хулаш, д1аьха дар из ди.
- Хьо, къаръяь, араяьккхача юрта додача балийх со лорадолда, - аьнна, кхыча юрта бодача новкъа д1адийрзад шайт1а.