...Низ балахь тхона

Кашамий аре мо, х1аний хьо, сайре,
Б1аь бала чубенна, 1ан юкъ мо шийла?
Х1ай, зама! Х1аний хьо сел дорха, хьайре,
Са дег чу ца ейташ сийрда уйла?

Да вийна моастаг1а мо, вахар да дорха,
Доаллаш мо г1ийлача къаман фу хоадо.
Х1аране ков-карта да, оахам мо, корха,
Мух хьайча хьоргдолаш цу т1ема боадо.

Белхача тхой ноаной г1ийла оаз хозаш,
Г1аддайна ваг1а со, набар-сий байна;
Ха йоацаш лийгарех човний дог лазаш,
Ах-бийсан боадоне, гударг мо хайна.

Б1аргий хий мехкадеш, лувчабеш накха,
Ваг1а со, са Аллах1, ду1а деш хайна.
Дог да са аьшк санна, уйлаш я акха,
Ер дуне 1ооллал дорхал чу1айна!

Ма дий Хьа ер дуне белараш белхабеш,
1а гораоттаваьв коттаваьннар хийла.
Укх замаг1, тхо да-кх массаза делхадеш,
Бераш т1ехь, керчадеш ц1енача ц1ийла.

Я-Аллах1, Я-Робби! Хьо воацар Даьла вац!
Малайкий оарцонца оарц далахь тхона!
Я-Аллах1, Я-Робби! Хьо воацар аьла вац!
Овляий оарцанца г1о делахь тхона!

Къиношта ц1енделахь, къаман барт белахь,
Укх балан букъ кагбе низ балахь тхона!
Г1ийлача ду1ашца кхайкарий юхь елахь,
Синошта ч1оаг1дала низ балахь тхона!

Даьмехках хьегарий меца б1арг бузабе,
Хьай дунен иразах цинц балахь тхона!
Тхоай къаман сий лорош, моастаг1ий эшабе,
Я-Аллах1, Я-Робби, низ балахь тхона!