Яндиев Джамалдин (Янднаькъан Хамарзий Джамалда)

[Menina]

Ага т1ара къаьна илли

Меца хьарг1а сигала хьувзар,
1аьржача лаьттан зем беш.
Дахчан ага г1ийла ц1увзар,
Шортта нанас теркадеш.

Бера ага шортта теркар,
Набара ткъам лестабеш,
Наьна б1аргара т1адамаш легар,
Миска дог делхадеш.

"Из меца хьарг1а маца юзаргья?
Из наьна дог маца делалургда?" -
Яхаш, наьна дог г1ийла делхар,
Дахчан ага шорта теркар.

[Menina]

Дог г1оздаьнна

Тахан са дог
Г1оздаьккха,
Сийрдаяьккха
Са уйла,
К1ай оалхазар мо
Г1етта,
Духьал йоаг1а
Сона 1уйре.

Т1ехьа ма виса,
Чехкале кога,
Хьай иллешца
Лоамаш деко.
1а дунен т1а
Ца даьр дац хьа,
Йоах сога
Детталуча дего.

Хьаькъалца доацаш,
1айха леладаьраш
Наькъ т1ара д1акховса,
Д1адаха.

Никъ боацаш
Мел дийцараш
Хьайца доацаш
Тахан ваха.

Йоах сога
Г1озъяьннача уйла.
Тахан са дог
Г1оздаьккха,
Сийрдаяьккха
Са уйла,
К1ай оалхазар мо
Г1етта,
Духьал йоаг1а сона
1уйре.

[Menina]

Лоамаш

Дарз хьакхарах,
Ди тохарах
Ага ца агаш,
Хало т1акхачарах,
Бала чуболарах,
Када ца кадаш.
Сатийна лаьттад шо,
Са наьна лоамаш.

Шун сабарца,
Шун деналца
Цхьан дийнахьа
Сай ваха йиш хилча,
Ховлда шоана
Сай вахар
Иштта даьсса
Хетарг ма дацар
Сона.

[Menina]

Пушкинга

Хьо дунен 1уйренга ваьнна
Уйлаех виза тахан латт,
Хьа иллех цецваьнна
Хьона хьалхашка со а латт.

Зама мел йода, адам мел дах,
Дунен т1ара довргдац хьа сий.
Тха ханара волаш мо, хьо тхоца вах,
Дег1аца ца леле а д1айха ц1ий.

Дукхабараша хьо иллешца хеставаьв.
Цхьабараша хьа чурта т1а зизаш дийхкад,
Аз а хьо сайна дега чура везандаь
Сай нана лаьтта хьа чурта т1а денад.

Дукха аз сайца леладаь лаьтта,
Сай даьшта дийза хьаьна лаьтта
Хьона даькъалдаь, аз хьо волча диллад.

[Menina]

Моаршал хилда шоана, лоаманхой!

Хьаг1а чу доахка жа санна,
Маьттазача лоама чу дехка,
Дег1а г1ирса зарзденна
Дахар шо, балах хьаьрча,
Сабар дола лоаманхой.

Халача дукъо фоарт йиа,
Къизача вахаро дог дожадаь,
Лела ца дуташ, вахарах даьха.
Наьна лоамашка лелар шо,
Цхьоаг1о йола лоаманхой.

Низболча октябрца
Шун вахар сийрдадаьлар,
Ленина уйлашца
Шун лелар г1оздаьлар,
Сий дола лоаманхой.

[Menina]

***

З1амига волаш е кхийна хьаэттача,
т1ом бувцарах мара бовзаш вацар со,
Т1ом хала ба, т1емо нах отто хилача,
Яхар мара, т1ема бала 1айша вацар со.

Моастаг1чох едда йоаг1ача,
Яхарах еха йоаг1ача
Кхалсага юхь т1арча сурто
Б1аьшера со т1ем т1а хилча санна,
Моастаг1чун къизал, т1ема сагото
Кизга чу санна, б1аргайойтар сона.

[Menina]

Г1овтта, к1антий

Илли

Даьхес вай т1ем т1а дех,
Лаьтта, сий, бокъо лорае.
Майра к1ант1ий цо лата бех,
Къиза моастаг1 вохаве.
Г1овтта, к1антий,
Г1овтта!
Кура к1антий,
Г1овтта!
Даьхе вай лораергья.
Тоха, к1антий,
Тоха,
Майра к1антий,
Тоха,
Моастаг1 вай вохоргва!
Тахан лелор моашал
Ма1ал доацаш ва,
Йоацаш сица доастамал,
Б1ехал вай оачаргба.
Г1овтта, к1антий,
Г1овтта,
Кура к1антий,
Г1овтта,
Даьхе вай лораергья.
Тоха, к1антий,
Тоха,
Майра к1антий,
Тоха,
Моастаг1 вай вохоргва.
Лаьш хинна дахачул,
Лаь доацаш довргда вай,
Сийдоацаш лелачул,
Сийдолаш довргда вай.
Г1овтта,
Кура к1антий,
Г1овтта,
Даьхе вай лораергья!
Тоха, к1антий,
Тоха,
Майра к1антий,
Тоха,
Вай моастаг1 вохоргва!

[Menina]

Наьнага

Саго ма де, ва нани, сагот ма де,
Ма лозабе сийдола к1айбенна корта
Цу корах арахьежаш, дог ма лозаде,
Со дагавоаллаш вай Даьхен т1ем т1а.

Тахан т1ема зама хьаэттача хана,
Со доастама, зовза хиларах ма кхералахь,
Со моастаг1чоа духьал латтача хана,
Ка аьга, т11ехьашка валара ма кхералахь.

Со, майра, т1ом баь, вай коа т1а веча,
Т1ем т1а леладаьраш аз хьона дувцаргда,
Со, моастаг1 вохаваь, хьона духьал веча,
Вай даха-лела 1оховшаргда.

Сагот ма де, ва нани, сагот ма де,
Со доастама, зовза хилара кхераш,
Цу корах арахьежаш дог ма лозаде,
Со, ка аьга, т1ехьашка валара кхераш.

[Menina]

Теша

Б1аргашка хий эттача, дог ч1ехко хургда 1а,
Со т1ем т1а вода аьнна хезача,
Дего бала бетташ, б1арг леша хургба хьа
Со воацаш, хьа цхьаьккха йисача.

Дега чу ша белла, б1арг лешо эшац хьона,
Со моастаг1ашта духьал вахав аьлча,
1аьржа таьзет дилла када езац хьона,
Со Даьхен т1ем т1а вийнав аьлча.

Со воаг1аргва хьона, теша, теша,
Б1айхача безамца ваха воаг1аргва хьона.
Зовзача маьраца дилла яхачул, - теша,
Къонахчун ц1и лелайича сийлехьа я хьона.

[Menina]

Адам г1отташ латт

Наьна лоамашкара
Сийрдача фордашка кхаччалца,
Малхбоалера
Малхбузе кхаччалца,
Даьрденна ц1окъа лом санна,
Адам г1отташ латт.
Дувцилга йоаца ч1оаг1а адам,
Алилга доаца майра адам.
1аьржа лаьтта декадеш,
Сийна сигале кхайкаеш,
Даьхен т1ем т1а отташ латт.
Шоай байнача даьй сий ца доаде,
Шоай къаьнача ноаной яхь ца йоае,
Лоаман лаьча санна сихденна,
Ц1окъа лом санна дорхденна,
Даьхен т1ем т1а отташ латт.